Constituziun
La baselgia e sia incumbensa
La Baselgia evangelica refurmada da la Svizra BERS dat perditga da Dieu sco il creader, da Jesus Cristus sco il salvader e ses unic chau, e dal Spiert sontg, il consolader e gidanter. Ella renconuscha en las scrittiras dal Vegl e dal Nov Testament la testimonianza da la revelaziun divina. Ella dat perditga, che nus essan salvads tras grazia e giustifitgads tras la cretta. (Preambel da la constituziun)
La BERS sa basa sin la constituziun ch’ è vegnida revedida en ils onns 2014-2019 e ch’ è vegnida messa en vigur per il 1. da schaner 2020. Cun la formulaziun da l’incumbensa determinescha ella la basa per l’existenza e l’agir da la baselgia evangelica refurmada: “La BERS annunzia cun pled e fatg l’evangeli da Jesus Cristus” (§ 2.1).
La constituziun descriva en ils emprims chapitels las premissas (I.) e las incumbensas (II.) da la baselgia, avant ch’ella fixescha finalmain las structuras da ses gremis. Latiers tutgan la sinoda, il Cussegl, il presidi dal Cussegl, la Conferenza dals presidis da las baselgias sco er las cumissiuns strategicas. En pli cuntegna la constituziun atgnas disposiziuns per exempel davart l’egualitad e la represchentanza equilibrada da las linguas naziunalas, sco er in scumond da discriminaziun.